Bir milletning béshigha külpet kelgende, milletni qutquzush üchün baturluq bilen meydangha sekrep chüshüp, milletni qutquzushqa atlinidighan oghlanliri yoq millet tarix bétidin öchüp ketidu.

Uyghur xelqining oghul- qizliri tarixtin buyan tajawuzchilargha, zulumgha qarshi, milletni qutquzush yolida öz pidakarliqini körsütüp keldi. Ular özlirining milliy we imaniy burchini ada qilip, öz xelqining erkinliki üchün issiq qéni, eziz janliridin kéchip, milletni hörlükke erishtürüsh yolida biz üchün shanliq ülge we tarixta öchmes izlarni qaldurup ketti. Batur, qehriman zeydin yüsüp we barin inqilabi ene shu shanliq tarixning jümlisidindur.

Zeydin yüsüp barin inqilabining bash qomandani bolup, 1964 - yili aqtu nahiyesining barin yézisida dunyagha kelgen. İlgiri ikki qétim qeshqer medriside oqughan. Ürümchi, aqsu, qaghiliq, xoten qatarliq jaylarda bolghan. 1989 - yilidin kéyin barin yézisida "sherqiy türkistan islam partiyisi" qurushqa kirishken we eza qobul qilghan. Qoral ـ yaragh teyyarlighan. Qaghiliqliq dosti obulqasim bilen mexpiy uchriship barin yézisida mujahidlarni terbiyelesh bilen bir waqitta barin inqilabigha biwaste qomandanliq qilghan. 1990- yili 4 - ayning 6 - küni chüsh waqti bilen xitay zalimlirigha qarshi jeng meydanida shehid bolghan. ALLAH merhumning yaqtan yerini jennette, nur ichide qilghay. Uyghur xelqi özining bu qehrimanidin pexrlinidu, hörmet, séghinish tuyghusida esleydu we xelqni erkinlik, azatliqqa érishtürgen´ge qeder bu küreshni qet´iy dawamlashturidu.

Barin inqilabi wetinimiz sherqiytürkistanning her qaysi jayliridin bir niyet, bir meqsette barin yézisigha toplashqan bir qisim inqilabiy qehrimanlirimizning teshebbusi bilen 1989 - yili 10 - ayning 10 - küni barin yézisida sherqiytürkistan azatliq teshkilatini qurghan. Bir mezgillik teyyarliq qilish netijiside, mezkur teshkilat 1990 - yili 4 - ayning 5 - küni tang seherde, xitay mustebit hakimiyitige qarshi resmi jeng élan qilghan. 4 - ayning 6 - küni chüsh waqti bilen bash qomandan zeydin yüsüp jeng meydanida shehid bolghan. Muntizim urush shu ayning 8 - küni kechqurun'ghiche dawamliship, axiri xitay hakimiyitining toluq qorallanghan herbiy qisimliri teripidin basturulghan.

Gerche barin inqilabi meghlup bolghan bolsimu u, uyghur xelqining yéqinqi zaman tarixdiki dewir bolgüch bir inqilab. Sherqiytürkistan xelqining xitay hökümitige bash egmeydighan, qul bolushni xalimaydighan iradisini dunyagha jakarlighan kün. Hörlük, musteqilliq üchün toxtawsiz küresh qilish üchün xitay hökümitige berilgen jarangliq signal, shundaqla erkinlik üchün dunyagha jakarlanghan küchlük bir xitap.

Barin inqilabi uyghur xelqining tiz pükmes qet´iy iradisi, qehriman bir millet ikenlikini, uyghur xelqining musteqilliqqa bolghan tewrenmes arzusi, rohini namayen qildi. Biz barin inqilabini söyünüsh we pexirlinish ichide esleymiz hemde bu inqilapta özlirining qimmetlik hayati we barliqini xelqning azatliqi üchün béghishlighan shehédlirimizni qayghu-hesret, hörmet- éhtiram bilen esleymiz, zeydin yüsüptek qehrimanlirimizdin pexirlinimiz. Sherqi türkistan xelqining xitay tajawuzchillirigha qarshi köresh iradisini namayen qilghan bu ehmiyetlik künni menggü unutmaymiz. Barin inqilabining uchqunliri qelbimizde menggu yalqunjaydu.

2023- yili 4- ayning 9- küni, Gérmaniye.